| 天然的上讚甲乙：各位裁判先生逐家好甲：我是○○乙：我是○○ (行禮)(宜蘭酒令調)甲：春神臨人間，大地喜洋洋；乙：一元才復始，萬象又更新。甲：用紅來代表充滿喜氣的春天是上妥當，你看我---規身紅。乙：喔!衫紅，帽仔紅。甲：(吐舌頭，手指舌頭)乙：連喙舌嘛紅---！(回神) 哇!你喙流血矣！甲：喂!莫講歹吉兆的話，毋是流血，是食這!乙：啊--（疑問）檨仔乾？！甲：是啊!食起來酸甜呀酸甜，看起來閣紅記記，會使講是好食閣好看面。乙：嗯!聽起來袂䆀!食起來敢真正有遮好?甲：我看你是枵鬼假細膩。哪! 一塊請你食!較袂予你講我是對鹽館入去，對染房出來~~鹹閣澀。乙：我是驚你食了出問題，時到病院就走袂離！真正是好心去予雷唚。甲：敢有遮嚴重？你真正是歹瓜厚子，歹人厚言語。乙：無講你毋捌！你敢無看電視有咧報，塑化劑害人不淺，有人食了蹛病院，有人食了去做仙。甲：哇!真濟足嚴重，你嘛閣講較詳細咧。乙：舊年新聞有咧報，歹心奸商真夭壽，為欲減少成本加趁錢，食品內摻塑化劑，飲料、麭(pháng)、糕仔餅逐項攏嘛走袂去。甲：真正有夠無天良，食了到底會按怎?乙：免疫(i̍k)消化系統攏嘛會著傷害，甚至會予人得著癌!甲：喔！真恐怖！啊毋過---，嘛毋是逐家攏會變這款？乙：你真正是七月半鴨—毋知死活。做人毋通傷鐵齒，到時你規組害了了，目屎你就掰(pue2)袂離。甲：看你講甲喙角全全泡(pho)，害我心肝頭phing碰采，飲料、糕仔餅袂磕(khap)得，腹肚枵枵欲按怎?乙：哪有可能叫你攏莫食，當然是愛揀咧食。甲：是食魚莫食肉？抑是食素莫食臊？你毋就較緊講！乙：攏不是！你敢毋知－天然的上讚！甲：「天然的上讚？」(疑惑)「天然的上讚！」喔~~！我知矣。乙：了解矣喔！我起一个頭，你就知影通紲尾。真正是烏矸仔貯豆油---無地看！甲：好佳哉你知影我(gâu)，抑無行出去絕對予人講「有眼不識泰山」。乙：是！是！是！就請先覺幫我解說。(作揖)甲：嗯！(清喉嚨)既然禮數遮齊全，我若無講就真正是人客罰徛-無意思。耳空剾(khau)清氣，斟酌聽予真。這「天然的上讚」它的意思就是---食「生」的上好。乙：(驚一趒)啊！我看你是拍賣貨底----凊彩講講咧。甲：抑無換你講！講啊！乙：管，一支長長啦，講！天然的上讚，就是講人工加工的較莫磕，加食原汁原味的食物。甲：喔！是按呢！塑化劑害人不淺，防腐劑色素嘛仝款。乙：規欉好好----無錯，你有斟酌聽喔！甲：當然囉！日頭赤焰焰，隨人顧性命。我嘛著愛知影淡薄仔。乙：真好，既然你有心知，閣報一項予你知。甲：是啥？乙：食的愛天然以外，用的、洗的嘛是愛。甲：你講的是用天然的洗劑，就親像黃目子(n̂g-ba̍k-tsí)乙：你哪會知？甲：用跤頭趺（kha-thâu-u）想嘛知！乙：（搖搖頭）閣有回鍋油會使用來做雪文，加入茶樹精油，殺菌功能閣愈強。甲：市面上的洗劑有啥毋好？漂白水功能強，浴間仔金爍爍，年底大摒掃，逐家攏嘛咧搶。乙：用你的頭殼小想咧，會清厝內絕對嘛會傷身體，你無感覺有的鼻起來足臭的，有的用起來會咬手，閣有……甲：(用手阻止乙)tsioh-toh-má-tè，小等一下。你嘛留些予我講。哪會使好空的予你規碗捀！乙：是！是！是！你就毋通籠床蓋嵌無峇，予家己落氣。甲：清潔功能這呢強，嘛有可能傷害身軀，予你帶疼厄。更加可怕的就是污染環境，落尾手，嘛是咱食虧。乙：哇！這擺講了有夠讚！你莫食矣啦！趕緊共彼提去擲。(打竹板)甲：汽水飲料真唌(siânn)人。乙：若摻塑化劑會害人。甲：糕仔餅糖仔有夠芳。乙：若有防腐劑千不通。甲：天然食物上健康。乙：好的營養內底藏。甲：天然洗劑減污染。乙：環境保護加一層。甲乙：使用天然產品人輕鬆啊！－人輕鬆！甲乙：天然的~~~~上讚！甲乙：多謝各位！(行禮) |
